Problema Entre STL, Vetaranus no Pedro Belo, Fretilin Kondena STL

Written by Domingos da Silva

Monday, 26 July 2010

Cornelio Gama, L-7, foto CJITL CJITL flash, Deputadu husi Partidu Opozisaun Fretilin konsidera hahalok Media Nasional “Suara Timor Lorosa’e – STL somente hakarak kria instabilidade iha rai laran liu husi ninia publikasaun hanesan foin lalais konaba kazu Komandante Polisia Distritu, Pedro Belo ne’ebe halo defamasaun ba Veteranus, Cornelio Gama Alias L7. Deputadu Osorio Florindo ne’ebe nudar veteranus ida mos konsidera media STL la’os foin dala ida deit maibe dala barak ona hakerek buat oi-oin no hakarak halo konflitu entre Veteranus no polisia. “Hau rona husi kolega sira husi media katak depois de intervista Pedro Belo koalia duni maibe la iha bukti tanba laiha rekaman”, dehan Osorio Florindo iha Parlamentu Nasional foin lalais ne’e. Tuir eis ativista ne’e katak STL nia objektivu mak hakarak Timor Leste moris iha konflitu nia laran no hakarak kria konflitu iha publiku. “Ita nudar Timor  oan atu koalia ho media sira seluk diak maibe atu koalia ho STL ita tenki kuidadu oituan”, Osorio komenta. Tanba ne’e, deputadu ne’e  husu Pedro Belo tenki ejiji STL para lori provas hodi  hatudu ba veteranus sira iha Parlamentu Nasional tanba veteranus la’os ema ida deit.   Nune’e mos nia katak veteranus la’os organizasaun ne’ebe mak hari’i iha 2000 maibe veteranus ne’e ema ne’ebe mak partisiapa iha luta naruk hodi nasaun ida ne’e hetan nia soberania. Ba kestaun ne’e Centru Jornalista Investigativu Timor Leste (CJITL) iha loron 23/07 koko  konfirma konaba kondenasaun husi deputadu iha Parlamentu Nasional ne’e maibe la konsege tanba Direitur STL, Domingos Saldanha rasik laiha tempu atu hasoru reporter CJITL. Kaju entre STL, Veteranus no Pedro Belo hahu husi publikasaun STL iha semana rua liu ba bainhira STL hakerek konaba intervista husi Pedro Belo ne’ebe dezvaloriza veteranus sira, maske Pedro Belo rasik konfirma fila fali ona ba media nasional sira katak nia la hateten liafuan saida deit ne’ebe dezvaloriza vetaranus sira liu husi media, no noticia ne’ebe hatun ne’e inventa husi redasaun STL rasik. Veteranus sira rasik fo moss sira presaun atu husu Pedro Belo rejigna an se nia koalia duni nune’e, ou husu taka jornal STL se karik jornal ne’e la professional. Kaju ne’e kontinua sai polemika, maske Secretariu Estado ba Asuntu Veteranus no Antigos Kombatentes, Marito Reis rasik ba jornalistas deklara prontu sai hanesan mediador.(Domingos Da silva/CJITL)

Last Updated ( Sunday, 25 July 2010 )