KKN ne’e mosu husi ema ne’ebé iha poder

Dili-Tempu okupasaun Indonezia, Timor oan sempre kaer metin prinsipiu ida “Mate Ka Moris Ukun Rasik An”, signifika katak brani foti desijaun, hodi fo nia an ba mate atu loron ida Timor Leste bele Ukun an.
Iha seminariu refleksaun loron internasional kombate korupsaun, tersa, (07/12) iha Convention Centre, eis merkadu lama Dili, Dr. Mari Alkatiri mos sai Panelista iha Seminariu ne,e.



Eis PM no aktual Sekretariu Jeral (SJ) Partidu FRETILIN Dr. Marí Alkatiri hateten, wainhira ema barak komesa hahu preokupa ho korupsaun, signifika katak, hotu-hotu iha konsensia katak korupsaun ne’e akontese duni iha governu AMP laran.

Tanba ne’e tuir Eis Primeiru Ministru Dr. Mari Alkatiri, pozitivu ema hotu preokupa ho KKN, hakarak hamutuk buka dalan ida hodi minimiza no hamate KKN.
Alkatiri dehan, KKN mosu husi ema ne’ebé iha poder, katak ema ne’ebé iha poder uza nia poder hodi halo kobransa oi-oin, halo apropriasaun illegal ba bens públiku no naun-Públiku.

Maibe, Nia dehan, preokupasaun boot ema hotu nia mak ba korupsaun ne’ebe akontese iha administrasaun publika.

Sekretariu Jeral (SJ) FRETILIN fo razaun katak, administrasaun Publika halo jestaun ba rekursu povu tomak ninian.
“Se rekursu Publika ne’e ita uza ba benefisia ita nia-an, familia no grupu deit ne’e korupsaun,” hateten nia.
Alkatiri realsa tan dehan, korupsaun ne’e laos deit iha governu, maibe iha mos parlamentu Nasional, seitor judisiariu no seluk tan.

Hirak ne’e Dr Mari Alkatiri dehan, tenki hadia sistema governasaun ida ke diak hodi taka dalan ba korupsaun.
Dalabarak, nia hatutan, kuandu kaer ukun ita moris iha kontradisaun ida entre hakarak halo sasan lalais no hakarak halo sasan tuir dalan loloos.

Eis Primeiru Ministru ne’e hatutan, hotu-hotu hakarak atu oinsa bele iha balansu entre halo lalais no halo loloos, dala ruma aselera buat ruma ne’e sala.
“Ita atu halai demais ita halo sala, ita loke odamatan ba ema sira ne’ebe liman lalais, lao lalais liu fali ita,” nia argumenta.

Korupsaun sai ona hanesan fenomena universal ida tanba iha kestaun relasaun internasional mos iha korupsaun, tanba tendensia boot wainhira lider husi nasaun ruma foti rekursu transfere ba kontas bankaria rai seluk, tanba rai sira ne’e hari’i sistema bankaria finanseiru para atu absorb (supa) osan husi rai seluk ne’ebe ema naok.
“Hakarak ka lakohi ne’e mos akontese dadaun iha ita nia rai moos,” deklara Eis Primeiru Ministru no Aktual Sekretariu Jeral FRETILIN Dr. Mari Alkatiri.